محتار وارجو المشوره :( :(

السلام عليكم اخوتي في المنتدي
بعد التحيه والسلام والذي منه
طبعا يمكن كتير منكو لاحظ اني غايب بقالي فتره عن المنتدي
ومبشاركش كتير زي الاول
وطبعا فيه ناس كتير عرفت وناس متعرفش بموضوع المشكله اللي حصلت لي في الشغل بسبب موضوع الاجهزه الرياضيه هنا عالمنتدي
ومن ساعتها بقي وانا عايش في قرف
وكل شويه تلكيك واستقصاد علي اي حاجه

اختصارا للوقت انا حاليا سبت الشغل نهائيا بلا رجعه
وبقالي شهر قاعد في البيت بلا عمل
المشكله حاليا اني خريج كليه التربيه قسم الحاسب الالي
يعني المفروض اني مدرس كمبيوتر
وطبعا عشان انا خرجت من الكليه علي الشغل اللي كنت فيه
وبالتالي مكتسبتش اي خبرات في مجال الكمبيوتر
وانا دلوقتي بقدم في كذا مجال لاني مش عارف اصلا اقدم في ايه
للاسف مجال خبرتي اصلا مش مطلوب حيعملوا ايه بواحد بيبيع اجهزه رياضيه ؟
فودافون وشركات الاتصالات كلها مبيقبلوش سن اكتر من 24 سنه
ليه مش عارف
وانا دلوقتي 29 سنه ولسه متجوز جديد
انا مش عارف اعمل ايه دلوقتي ؟
انا بحب مجال الكمبيوتر عموما
وكنت داخل كليتي مخصوص عشان اخد فكره عامه ومنها اخرج اخد كورسات متخصصه واتخصص في اي مجال منهم
انا حاسس اني ضيعت عمري وحياتي وفي الاخر خدت علي قفايا
هل فيه امل لو رجعت اخدت الكورسات دي تاني هل حعرف اشتغل بيها
ولا بردو مفيش فايده عشان السن ؟
واخد كورسات في ايه
ايه المجال اللي شغال في مصر دلوقتي او عموما مطلوب ومرتباته كويسه تفتح بيت وتعيشني حياه كريمه
قريت شويه في البرمجه وناس قالتلي فيجوال بيسك دوت نت مطلوبه
وناس تانيه قالتلي خد كورس في لغه php وهوا ده المستقبل
وناس تالته قالولي الشبكات وتصميم المواقع
انا محتار ومش عاوز اضيع وقت تاني في كلام فاضي
انا دلوقتي مش حر نفسي
عشان اقضيها
محتار جدا ومش عارف اخد قرار
وملقيتش غير اخواتي هنا افضفض معاهم
وارجو كمان اللي عنده اقتراح وفكره تانيه خالص غير اللي في دماغي ده يقولي عليها
بس عاوز احدد الطريق اللي امشي فيه عشان مرجعش اندم زي مانا ندمان دلوقتي علي العمر اللي ضيعته

لا تندم على ما فاتك وانظر لاتيك.

بص يا صبحى انا اخويا اخد كورسات كتير جدا ومنها الشبكات وبصراحة شغلها مطلوب وربنا وفقه الحمد لله مع شركة كويسة .

فى رائى الكمبيوتر مجاله كويس لان مفيش شركة حاليا مفيهاش كمبيوتر او بتتعامل معاه وممكن كمان تاخد كورس صيانة سوفت وير وهارد وير.

بس لو انا مكانك هدور على شغل الاول وبعدين ابص على الكورسات عشان اوفق مواعيد الكورسات مع الشغل.

مش هاقدر اقولك غير ربنا يعينك

اقتباس:

---

المشاركة الأصلية كتبت بواسطة Ayman-Ahmed

لا تندم على ما فاتك وانظر لاتيك.

بص يا صبحى انا اخويا اخد كورسات كتير جدا ومنها الشبكات وبصراحة شغلها مطلوب وربنا وفقه الحمد لله مع شركة كويسة .

فى رائى الكمبيوتر مجاله كويس لان مفيش شركة حاليا مفيهاش كمبيوتر او بتتعامل معاه وممكن كمان تاخد كورس صيانة سوفت وير وهارد وير.

بس لو انا مكانك هدور على شغل الاول وبعدين ابص على الكورسات عشان اوفق مواعيد الكورسات مع الشغل.

---

مانا حعمل كده طبعا
بس بصراحه حاليا مفيش شغل خالص غير الشغلانات الزفت بتاعت مندوب مبيعات دي
مرتبات ضعيفه ومفيش طبعا عمولات اصلا وكله كلام في الهجايص

فانا مبدأيا حاخد كورس icdl
ده ملوش دعوه بحاجه وكده كده لازم اخده الاول
فعشان مضيعش وقت حاخده في الفتره اللي انا قاعد فيها دي
بدل قعده البيت
واديني بسعي اني ادور علي اي حاجه اشغل بيها وقتي
بس مش لاقي
وفي نفس الوقت تجيب فلوس عشان اصرف علي البيت وعلي الكورسات كمان

المشكله اني عاوز حد فعلا يكون في المجال يعرفني السكه ماشيه ازاي
بدل ما اخد كورسات وتطلع ملهاش لازمه
زي مثلا ناس كتير قالتلي اخد فيجوال بيسك 6
واهو طلع قديم ومبقاش ليه مجال حاليا غير قليل والناس بدات تتجه للدوت نت

كمان عندي احساس ان البرمجه شغلها اكتر من الشبكات
مش عارف ليه
؟

يعني ال it في اي شركه ده بيكون مبرمج ولا ايه بالظبط

اقتباس:

---

المشاركة الأصلية كتبت بواسطة walidadel

مش هاقدر اقولك غير ربنا يعينك

---

ربنا يخليك ياوليد باشا
نسالك الدعاء

انت عندك استعداد تدرس مده قد ايه بجانب أي شغل مؤقت ؟

و ليه مفكرتش تعمل مشروع في مجال خبرتك

انا اسف جدا مش هقدر افيدك علشان معرفش حاجة خالص عن مجال الكمبيوتر
ربنا يوفقك و يعينك ان شاء الله و يوفقك لما تحب و ترضي ان شاء الله

عليك بالاستغفار
من لزم الاستغفار جعل اللة لة من كل هما مخرجا او كما قال رسول اللة صلى اللة علية وسلم

اقتباس:

---

المشاركة الأصلية كتبت بواسطة pro_samir

انت عندك استعداد تدرس مده قد ايه بجانب أي شغل مؤقت ؟

و ليه مفكرتش تعمل مشروع في مجال خبرتك

---

اي مده مش فارقه طالما ده ليه فايده وحيعود عليا بالنفع
وطبعا اول حاجه عملتها اني فكرت استقل بنفسي واخدت خطوات لكده فعلا
ولكن عرفت بالكلام كده وبطريقه غير مباشره ان مرفوض اني اخد بضاعه حتي لو كاش
نوع من انواع الضغط
فقلت اسيب الدنيا كلها واشوفلي حاجه تانيه احسن
ولو مؤقتا لحد ما الدنيا ترجع تاني واقدر ادخل مجالي تاني

اقتباس:

---

المشاركة الأصلية كتبت بواسطة funnymickey

اي مده مش فارقه طالما ده ليه فايده وحيعود عليا بالنفع
وطبعا اول حاجه عملتها اني فكرت استقل بنفسي واخدت خطوات لكده فعلا
ولكن عرفت بالكلام كده وبطريقه غير مباشره ان مرفوض اني اخد بضاعه حتي لو كاش
نوع من انواع الضغط
فقلت اسيب الدنيا كلها واشوفلي حاجه تانيه احسن
ولو مؤقتا لحد ما الدنيا ترجع تاني واقدر ادخل مجالي تاني

---

اولا قدر الله و ما شاء فعل
و مين عارف يمكن الموضوع ده لو اخدته على انه فرصه تحسن بيها حياتك و مستقبلك بطريقه ماكانتش ممكن تحصل لو كنت استمريت فى شغلك القديم.
انت دلوقتى حر نفسك و وقتك فى ايدك ( و دى فرصه ما يقدرهاش الا اللى بيشتغل و فاتح مشروع و مخلى حد تانى يقفله فيه)
افكارك ممكن بقى فرص لمشاريع ماتكلفش كتير
مش لازم خبرتك... و مش لازم مجال دراستك...
فكر فى اى حاجه صغيره و لو تبيع فول على عربيه ما تقعدش يوم واحد من غير شغل
اشتغل اىىىىىىىىىىىىىى حاجه و انت بتفكر فى مشروع
انما حتصرف من مدخراتك لحد ما تخلص و ما تلاقيش اللى تبتدى بيه و جايز ماتلاقيش حد يسلفك

ربنا معاك و طمنا عليك

لو بتحب تفكر وتقرا كتيير وتفضل دايما مع احدث التطورات يبقي ممكن تمشي في سكة البرمجه ودي ليها فروع كتيير
لو عندك حس فني وبتعرف تعمل تصميم مواقع وشغل جرافيكس يبقي دووس والموضوع مطلوب برده
غير كده ممكن تدوس في الشبكات وال Administration

بالنسبه للبرمجه لو عايز تشتغل في مصر يبقي عليك وعلي ال Dot Net وخصوصا ال C# سي شارب مش فيجوال بيزك وخليك في اخر حاجه يعني Dot Net 3.5 and 4 وياسلام لو تقدر تتعلم SharePoint 2010 الشركات هتخطفك خطف

PHP حاجه لذيذه وبتتعلمها بسرعه وسهله بس ملهاش شغل كتيير في مصر لكن لو عايز تشتغل من علي النت ليها شغل كتيير جدا وفلوسه حلوه

وتوكل علي الله وموضوع السن في البرمجه عادي جدا ومحدش بيسال عليه وان شاء الله ربنا يكرمك

ربنا يسهل الامور ولما اكلم اخويا بعد الشغل هعرفلك منه تفاصيل اكتر بس قوللى انت خبراتك ايه؟

بص يا صبحى باشا

الكمبيوتر مجالاته كتير و واسعة و متشعبة

منها البرمجة و إدراة النُظم ( systems Administration ) و إدارة الشبكات ( Networks Administration ) و إدارة قواعد البيانات ( DB Administration ) و تأمين الشبكات ( Network Security )


كل حاجة من دول ليها فروع جواها.....زى البرمجة...عندك ال VB.Net و PHP و Jave و غيره
إدارة النُظم فيها ويندوز و لينكس و AIX و حاجات تانية جواها.....و هكذا فى باقى المجالات.

حدد الأول أنت اى مجال من دول حابب تشتغل فيه أكتر.....و لو مش فارق معاك دور فى مواقع التوظيف على أى الوظائف مطلوبة أكتر و بتاء عليه أبتدى أدخل فى المجال ده

بص يا سيدي
من رأيي تتعلم الحاجات دي
1- c#
2- php
3- Joomla or Drupal
و بعدين تسجل نفسك علي الموقع ده Freelancer.com - Hire Freelancers & Find Freelance Jobs Online
الموقع ده بيبقي عليه طلبات مشاريع بالهبل. ممكن تخش و تختار المشروع و تنافس الناس التانيين علي عروض الاسعار و تشتغل من بيتك و تبقي مدير نفسك. و الدخل في الاول بيبقي قليل بس بعد ما تاخد مشاريع كتير و يبقي ليك سمعة علي الموقع ممكن كمان تفتح شركتك الخاصة و تشتغل لس علي الموقع ده.
الهنود طاحنين الموقع و بيضربو جامد في الاسعار. بس صدقني دي فرصة حلوة اوي ليك
و لغات البرمجة اللي انا كاتبها فوق سهلة جدا و في مواقع كتييييييييير بتشرحها
بالنسبة ل Joomla & Drupal دول يا سيدي حاجة اسمها CMS بتديك امكانية انك تبني مواقع بلغة ال php بس بطريقة سهلة جدا و مش محتاجة تتعلم لغات برمجة حتي.
Joomla واخد افضل CMS علي الاطلاق.
انت محتاج شهرين علي الاقل من الطحن و العزيمة و الاصرار انك تبقي محترف في الحاجات دي. بس بعد كده ادعيلي ....
يا رب اكون افدتك

نصيحة من اخوك

بلاشش مجال الكمبيوتر والاي تي بالذات مش عايز اقوللك انا ساعات بكلم نفسي

المهم مجال الاي تي فيه فلوس وشغلو مقرف شوية لانك المفروض تحل المشكلة وقتي فلازم تبقي دماغ

بالنسبة للكورسات a+ icdl + mcitp + exchange + ccna +ccnp

بس انت لازم تحدد دماغك رايحة علي فين

وهات نسخة من السي في بتاعك واكتب اخر مرتب اخدتو

هابعتللك الميل اللي هتبعت عليه عالخاص وربنا يسهلها باذن الله

بص كدة يا صبحى على الموقع ده وربنا يسهل الامور.

ظˆط¸ط§ط¦ظپ - ظ…ظˆظ‚ط¹ ظˆط¸ط§ط¦ظپ ط§ظ„ط´ط±ظ‚ ط§ظ„ط§ظˆط³ط· - ظˆط¸ط§ط¦ظپ ط®ط§ظ„ظٹط© ظˆ ظˆط¸ط§ط¦ظپ ط´ط§ط؛ط±ط©

ربنا يكرمك ويوفقك ياباشا للخير ان شاء الله

المجالات كتير فعلا زي ما الرجاله قالولك ، وكل حاجه عايزه دماغ لوحدها ..

بس المهم انت ايه اللي يتوافق معاك .. بتكلم علي طبيعة الشغل نفسه

هل انت شخصيتك هتقدر يبقي كل شغلك وشك في الشاشه ليل نهار ؟ ومش مجرد كورس وتشتغل انت لازم تشتغل مشاريع مشاريع مشاريع ومشاكل وتدور علي حلول وسيرش ومذاكره ..

لو دماغك شغاله هيبقي عادي مش صعب لكن المهم انت طبيعة شخصيتك هتقدر علي القعده والمذاكره والتطبيق باستمرار ولا هتتخنق .. هي دي القصه في البرمجه .. بالاضافه انك محتاج وقت علي ما توصل لمستوي كويس

وحاجه زي الجرافيك وتصميمات الويب هتبقي اسهل وممتازه .. بس برضو لازم تكون انت مبدع وعندك سينس عالي علشان تتميز لأنها حرفه مش وظيفه

البرمجه مش شوية حاجات هتتعلمها وتعيش عليها بقية حياتك زي التدريس مثلا
دي قرايه وبحث وتفكير طول عمرك

اقتباس:

---

المشاركة الأصلية كتبت بواسطة pro_samir

المجالات كتير فعلا زي ما الرجاله قالولك ، وكل حاجه عايزه دماغ لوحدها ..

بس المهم انت ايه اللي يتوافق معاك .. بتكلم علي طبيعة الشغل نفسه

هل انت شخصيتك هتقدر يبقي كل شغلك وشك في الشاشه ليل نهار ؟ ومش مجرد كورس وتشتغل انت لازم تشتغل مشاريع مشاريع مشاريع ومشاكل وتدور علي حلول وسيرش ومذاكره ..

لو دماغك شغاله هيبقي عادي مش صعب لكن المهم انت طبيعة شخصيتك هتقدر علي القعده والمذاكره والتطبيق باستمرار ولا هتتخنق .. هي دي القصه في البرمجه .. بالاضافه انك محتاج وقت علي ما توصل لمستوي كويس

وحاجه زي الجرافيك وتصميمات الويب هتبقي اسهل وممتازه .. بس برضو لازم تكون انت مبدع وعندك سينس عالي علشان تتميز لأنها حرفه مش وظيفه

---

مانا قاعد عالشاشه ليل نهار اهو
والحمد لله لما بذاكر في حاجه انا اصلا بحبها مبزهقش
وانا بحب المجال ده

انما كحس تصميم وومبدع والكلام ده بصراحه مليش فيه
حاسس اني ميال لشغل البرمجه اكتر
معرفش ليه

ربنا يكرم ان شاء الله
انا بس عاوز اعرف
ابتدي الطريق ازاي دلوقتي
؟

لو عندك فكره عن البرمجه عموما ممكن تقرا بنفسك وتنزل فيديوهات وشرح للحاجات السابق زكرها
بالنسبه للسي شارب والدوت نت عموما ادخل علي Get Started with ASP.NET: The Official Microsoft ASP.NET Site
هتلاقي فيديوهات من الألف للياء

لو معندكش فكره يبقي خد كورس

صبحى ولا يهمك ربنا حيفرجها قريب انت بس بص لقدام وانسى القديم ومتخفش مفيش حاجة درستها فى الدنيا ملهاش لازمة وكلة فى ال cv بتاعك ربنا يعينك يارب ويفرجها عليك

ربنا يعينك ,
بص مفيش شركة مفيهاش اجهزة كمبيوتر ,
يعني الناس اللي بتشتغل في صيانة الأجهزة دول اكتر حاجة بتبقى مطلوبة ,
و لو الشركة كبيرة يبقى مطلوب الناس اللي بتشتغل في الشبكات ,
و بعد كده هتلاقي المبرمجين لأن كتير من الشركات بتستخدم برامج جاهزة ,
و لو حابب تشتغل في مجال البرمجة انا بنصحك ادرس قواعد بيانات SQL الأول و Dot Net

أسأل الله تعالى ان يفرج همك ويفك كربك ويوسع رزقك وكل المسلمين اجمعين.

اخي الكريم...عليك بالدعاء فهو سلاح المؤمن (مع السعي وبذل الجهد).

اذا أذنت لي , كان عندي سؤال للإخوة ذوي الخبرة في المنتدى ووجدت هذا الموضوع فوجدت انه من الأفضل ان اطرح سؤالي هنا بدل من انشاء موضوع جديد حتى يكون في نفس سياق الموضوع وتـعم الفائدة للجميع.

سؤالي هو:
ماهي افضل الاماكن لكورسات البرمجة من حيث الجودة ومستوى ال instructors؟

تحديدا : Java
C#
PHP,جافاسكربت ,XML عذرا اضطررت لكتابتها بالعربية حيث أن المنتدى لايقبل كلمة سكربت بالإنجليزية
Networks
Linux

وجزاكم الله خيرا
والسلام عليكم ورحمة الله وبركاته...

ربنا يوفقك وتلاقى مجال مناسب ليك

رب ضاره نافعه

ربنا يمكن عمل كده عشان يفتحلك مجال رزق جديد بعد متجوزت وبقت مسؤل عن بيت واسره وقريبا اولاد

انا اول مره اعرف ان مجال دراستك كمبيوتر زى يا صبحى
نصيحه من اخ بلاش منه حيوجع دماغك وبعدين مش حتيجى بعد موصلت ل 29 سنه ولسه حتبتدى فيه وتاخد كورسات لمده سنه الى 3 سنوات عشان تقدر تشتغل بيها ولو عرفت تشتغل شوف كام واحد فى المجال ده دلوقتى ومعاه شهدات وعنده خبره ومش لاقى شغل او شغال بس بمرتب على ما تفرج
وطبعا انت مش لوحدك انت فاتح بيت يعنى مين حيصرف طول الفتره دى


انا ارشحلك التجاره وانت لسانك حلو+ انك عندك خبره فيها وحتعرف ازاى تتعامل مع الناس
حاول تحل مشكلتك مع التجار اللى مش عاوزين يدولك بضاعه او تشوف ناس غيرهم حتى لو فى محافظات تانيه الدنيا مش حتقف على الكام واحد دول يعنى دى لو وصلت انك تخلى حد يتعامل معاهم بعيد عنك وانت تاخد منه

ولو المجال بتاعك مقفول اوى كده دور فى مجال تانى قريب منه تعرف تسلك فيه
التجاره مجالها واسع وحتعرف تسلك فيه بسرعه مش حتحتاج وقت كبير عقبال ما العجله تمشى

المشكله فى احوال البلد الحاليه واقفه حال الناس كلها كلها سواء تجار او اصحاب محلات او موظفين فى اى مكان

يعنى كان لازم تسيب الشغل الايام دى ياعم :)

اهو ده عيب الواحد اللي متربي علي ان كرامته اغلي من نفسه
انما فيه ناس تانيه تلاقيها بتاخد علي قفاها وتقول كمان
وانا مبعرفش اعمل كده ياحج ميسو
ربنا كريم ويرزق

اقتباس:

---

المشاركة الأصلية كتبت بواسطة funnymickey

اهو ده عيب الواحد اللي متربي علي ان كرامته اغلي من نفسه
انما فيه ناس تانيه تلاقيها بتاخد علي قفاها وتقول كمان
وانا مبعرفش اعمل كده ياحج ميسو
ربنا كريم ويرزق

---

والله يا صبحى انا بسبب الموضوع ده من سنيييييييين وانا واخد قرار انى اشتغل مع نفسى وابقى مريح دماغى

لكن برضه ده ليه مميزات وعيوب وده ليه مميزات وعيوب

بس لو انت من النوع اللى مبيحبش حد يتحكم فيه يبقى الافضل زى مقولتلك اصلى انا جربت سكه البرمجه وتصميم المواقع والكلام ده ومعايا شهادات فيه

بس انت ميال تعمل ايه اكتر